DKA-n monoilo ‘Gõychi Osmitai’ Dis

DKA-n monoilo ‘Gõychi Osmitai’ Dis

RTI Kaido boroch punn kaim lok vankddo upiog kortat :Adv. Keni

DKA-n monoilo ‘Gõychi Osmitai’ Dis

Moddganv : Right to Information (RTI) ho kaido khub boro punn kaim lok
tacho vankddo upiog kortat oxe udgar Retired Judge Adv. Moti Keni hannem
kaddle. To Dalgado Konknni Akademin (DKA) ghoddoun haddlolea ‘Gõychi
Osmitai’ Disa nimtan 16 Janerak Moddganvchea Ravindra Bhovonant uloitalo.
Tache borabor DKA-cho Odheokx Tomazinho Cardozo, Chittnis Vincy Quadros ani
Bhanddari Celso Fernandes machier hajir asle.

Zanntteleamni nirmann keloli sahityachi palki mukhar vhorpacho ulo ditanam
Adv. Motin sanglem ki RTI kaido sarko sompo ani lok-upiogi asa. Ami
jiyetolie lokxayent zata title pardorxok (transparent) ani ugte asonk zai.
RTI kaidea pormannem amkam zai ti mahiti amchean magonk zata ani ti 30
disam bhitor mellonk zai. Zor tor ti 30 disam bhitor mell’lli nam zalear
ti fukott divpachi ani tea divpi odhikaria koddlean mult usul korun
ghevpachi hea kaideant tortud asa. Te uprant Commissioner-ak ‘appeal’
korunk zata. Itlem sompeponn aslem zalear pasun kaim lok hea kaideacho
durupiog kortat, kaim pautti odhikariank sotavpak ani kaim pautti fukott
mahiti melloun ghevpak mhunnonui tannem sanglem.

Adv. Kenin purai kaideachim kolmam udahornnam soit bore bhoxen somzait hea
kaidea marfot kitem magonk zata ani kitem magonk mellonam tem spoxtt
kortanam tannem mhunnlem ki jem kitem Vidhan Sobhent ani Sonsodent diunk
zata tem hea kaidea khala konnakui diunk zata. Hea kaideak lagon somajik
yontronnam modem zaitem boreponn zalam. Boreach promannant bhroxttachearak
fottko bosla, xikxonnik ani somajik mollarui bodol ghoddon aileat mhunn
Adv. Kenin sanglem.

Odheokxiy ulopvant Odheokx Tomazinhan sanglem ki 1967 vorsa zalolo ‘Opinion
Poll’ mhollear Gõychi osmitai sambhallunk ek zhuz aslem ani taka Gõykaramni
xanneponnan nirnnoi dilo ani Gõy Maharashtrant vilin zavpachem salvar
kelem. Je meren ami amchea jivitant Konknni vaporche nant, te meren amchi
osmitai rakhun urchi nam. Gõyant zaite NGO asat je Save Goa mhunnttat ani
Gõychim xetam, ranam, poryavoronn, zhaddam sambhallunk vavurtat. Hem
sogllem sambhallun Gõy pachvem-char kelem ani Konknni sambhallun urli nam
zalear hem sogllem kiteak upkartolem? Tannem Dr. Jack de Sequeira ani
tache boraborchea fuddariank argam omplim ani Gõychi osmitai sambhallunk
tornatteank ulo marlo.

Yeukarachem ulovp kortanam Chittnis Vincy Quadros-an ‘Opinion Poll’-a thaun
Gõyak Ghottok Rajyacho dorzo mello merenchio ghoddnnuko yad korun dilio ani
protiek Gõykaran hea Osmitai Disacho obhiman ballgunk zai mhonn sanglem.

Survatek Elick Vaz hachi sonskrutik karyavoll zali. Bhanddari Celso
Fernandes hannem soglleanche upkar mandle zalear Sonia Gomes hannem
sutrsonchealon kelem.

Our Policy

WE RESPECT YOUR OWN LANGUAGE , LITERATURE , CULTURE, CRITICS , TIPS , ENVIRONMENTAL JUDGEMENT AND FLOCKING TO GATHER THE WORLD-MOST GOODNESS

Categories

Upcoming Events

View All Events